jahan mein ho gai na-haq teri jafa badnam
kuchh ahl-e-shauq ko dar-o-rasan se pyar bhi hai

Aal-e-Ahmad Suroor

---

---

aaj pi kar bhi wahi tishna-labi hai saqi
lutf mein tere kahin koi kami hai saqi

Aal-e-Ahmad Suroor

---

---

hasti ke bhayanak nazzare sath apne chale hain duniya se
ye KHwab-e-pareshan aur hum ko ta-subh-e-qayamat sona hai

Aal-e-Ahmad Suroor

---

---

hum to kahte the zamana hi nahin jauhar-shanas
ghaur se dekha to apne mein kami pai gai

Aal-e-Ahmad Suroor

---

---

hum jis ke ho gae wo hamara na ho saka
yun bhi hua hisab barabar kabhi kabhi

Aal-e-Ahmad Suroor

---

---

astiyan kuchh huin viran to matam kaisa
kuchh KHarabe bhi to aabaad hua karte hain

Aal-e-Ahmad Suroor

---

---

abhi aate nahin us rind ko aadab-e-mai-KHana
jo apni tishnagi ko faiz-e-saqi ki kami samjhe

Aal-e-Ahmad Suroor

---

---

ab dhanak ke rang bhi un ko bhale lagte nahin
mast sare shahr wale KHun ki holi mein the

Aal-e-Ahmad Suroor

---

---

aati hai dhaar un ke karam se shuur mein
dushman mile hain dost se behtar kabhi kabhi

Aal-e-Ahmad Suroor

---

---