kaun Dubega kise par utarna hai 'zafar'
faisla waqt ke dariya mein utar kar hoga

Ahmad Zafar

---

---

'aKHtar' guzarte lamhon ki aahaT pe yun na chaunk
is matami julus mein ek zindagi bhi hai

Akhtar Hoshiyarpuri

---

---

guzarte waqt ne kya kya na chaara-sazi ki
wagarna zaKHm jo us ne diya tha kari tha

Akhtar Hoshiyarpuri

---

---

waqt ab dastaras mein hai 'aKHtar'
ab to main jis jahan tak ho aaun

Akhtar Usman

---

---

oke se kahin hadsa-e-waqt ruka hai
shoalon se bacha shahr to shabnam se jala hai

Ali Ahmad Jalili

---

---

subh hoti hai sham hoti hai
umr yunhi tamam hoti hai

Amirullah Tasleem

---

---

waqt jab karwaTen badalta hai
fitna-e-hashr sath chalta hai

Anwar Sabri

---

---