palaT kar ashk su-e-chashm-e-tar aata nahin hai
ye wo bhaTka musafir hai jo ghar aata nahin hai

Khursheed Rizvi

---

---

'KHurshid' ab kahan hai kisi ko pata nahin
guzra to tha kisi ka pata puchhta hua

Khursheed Rizvi

---

---

maqam jin ka muarriKH ke hafize mein nahin
shikast o fath ke ma-bain marhale hum log

Khursheed Rizvi

---

---

maut ki ek alamat hai agar dekha jae
ruh ka chaar anasir pe sawari karna

Khursheed Rizvi

---

---

mere is awwalin ashk-e-mohabbat par nazar kar
ye moti sip mein phir umr-bhar aata nahin hai

Khursheed Rizvi

---

---

mujhe bhi apna dil-e-rafta yaad aata hai
kabhi kabhi kisi bazar se guzarte hue

Khursheed Rizvi

---

---

nusKHa-e-marham-e-iksir batane wale
tu mera zaKHm to pahle mujhe wapas kar de

Khursheed Rizvi

---

---

tu mujhe bante bigaDte hue ab ghaur se dekh
waqt kal chaak pe rahne de na rahne de mujhe

Khursheed Rizvi

---

---

ye daur wo hai ki baiThe raho charagh-tale
sabhi ko bazm mein dekho magar dikhai na do

Khursheed Rizvi

---

---