Tisri barish se pahle

us roz mausam-e-KHizan ki pahli barish hui
jab us ne mere dar se aaKHiri bar qadam nikala

us ne meri rasoi se ek niwala na liya
mere kuen se ek ghunT na piya

aur mere honTon ka ek bosa na liya
balki pahle liye hue sare bose

thuk diye
jab mausam-e-KHizan ki dusri barish hui

to meri rasoi mein ek sanp nikla
mere kuen mein ek meinDak paida hua

aur mere honTon par pahli papDi jami
tab se ab tak sanp

rasoi mein ghat lagae hai
meinDak kuen mein dubka hai

aur jaane wala
rozana mere dar par dastak deta hai

apne thuke hue bose
chaTne ke liye