Mohabbat ki aaKHiri nazm

dam-e-ruKHsat
tape hue lahje mein KHamosh rahne wala

aankhon tak sulag uTha hoga
us ki sanson se mera dam ruk gaya

aur meri hatheliyan dhaDakne lagin
mera mard pure chand ki tarah mujh par chha gaya

wo aag se murattab hai
mere ang ang mein pighalne ki aarzu hai

us ke lams mein mere KHamir ki KHushbu kahan se sama gai
ki main apni talash mein us tak aa pahunchi

us ki aankhon mein meri aankhen thin
jab use mujh se juda kiya gaya

wo darwaze se bahar bhi darwaze ke andar tha
aur main darwaze ke andar bhi darwaze se bahar thi