Madam

aap be-wajh pareshan si kyun hain madam
log kahte hain to phir Thik hi kahte honge

mere ahbab ne tahzib na sikhi hogi
mere mahaul mein insan na rahte honge

nur-e-sarmaya se hai ru-e-tamaddun ki jila
hum jahan hain wahan tahzib nahin pal sakti

muflisi hiss-e-latafat ko miTa deti hai
bhuk aadab ke sanchon mein nahin Dhal sakti

log kahte hain to logon pe tajjub kaisa
sach to kahte hain ki nadaron ki izzat kaisi

log kahte hain magar aap abhi tak chup hain
aap bhi kahiye gharibon mein sharafat kaisi

nek madam bahut jald wo daur aaega
jab hamein zist ke adwar parakhne honge

apni zillat ki qasam aap ki azmat ki qasam
hum ko tazim ke mear parakhne honge

hum ne har daur mein tazlil sahi hai lekin
hum ne har daur ke chehre ko ziya baKHshi hai

hum ne har daur mein mehnat ke sitam jhele hain
hum ne har daur ke hathon ko hina baKHshi hai

lekin in talKH mabahis se bhala kya hasil
log kahte hain to phir Thik hi kahte honge

mere ahbab ne tahzib na sikhi hogi
main jahan hun wahan insan na rahte honge

wajh-e-be-rangi-e-gulzar kahun ya na kahun
kaun hai kitna gunahgar kahun ya na kahun