KHamushi

koi image kisi baat ka hasin saya
nae purane KHayalon ka ek achhuta mel

kisi ki yaad ka bhaTka hua koi jugnu
kisi ke nile se kaghaz pe chand adhure lafz

baghawaton ka purana ghisa piTa nara
kisi kitab mein zinda magar chhupi ummid

purani ghazlon ki ek rakh be-dili aisi
KHud apne aap se uljhan ajib be-zari

gharaz ki muD ke sau rang aaine partaw
magar ye kya hua ab kuchh bhi likh nahin sakta

na jaane kab se ye be-mani KHamushi be-muhit
KHud apne sae se main chhuT gaya hun ya shayad

kahin main lafzon ki duniya ko chhoD aaya hun