Ehsas-e-kaamran

ufuq-e-rus se phuTi hai nai subh ki zau
shab ka tarik jigar chaak hua jata hai

tirgi jitna sambhalne ke liye rukti hai
surKH sail aur bhi bebak hua jata hai

samraj apne wasilon pe bharosa na kare
kohna zanjiron ki jhankaren nahin rah saktin

jazba-e-nusrat-e-jamhur ki baDhti rau mein
mulk aur qaum ki diwaren nahin rah saktin

sang-o-ahan ki chaTTanen hain awami jazbe
maut ke rengte sayon se kaho haT jaen

karwaTen le ke machalne ko hai sail-e-anwar
tira-o-tar ghaTaon se kaho chhaT jaen

sal-ha-sal ke bechain shararon ka KHarosh
ek nai zist ka dar baz kiya chahta hai

azm-e-azadi-e-insan ba-hazaran jabrut
ek nae daur ka aaghaz kiya chahta hai

bartar aqwam ke maghrur KHudaon se kaho
aaKHiri bar zara apna tarana dohraen

aur phir apni siyasat pe pasheman ho kar
apne nakaam iradon ka kafan le aaen

surKH tufan ki maujon ke jakaDne ke liye
koi zanjir-e-giran kaam nahin aa sakti

raqs karti hui kirnon ke talatum ki qasam
arsa-e-dahr pe ab sham nahin chha sakti