دلی 25 جون 1975

پل ہی پل میں یہ سارا تماشا ہوا
شہر کے پانو میں سنسناتی ہوئی

ایک گولی لگی
اور وہ چکرا کے

دھرتی پہ اوندھا گرا
دیکھتے دیکھتے اس کے چاروں طرف

خون کا ایک تالاب سا بن گیا
جھاڑیوں سے ڈری سہمی چڑیاں اڑیں

اونچے اونچے درختوں کے
گنجان پتوں میں دبکے ہوئے

سب پرندے اڑے
چیختے چیختے

اور دہشت زدہ آسمانوں
کے صحراؤں میں کھو گئے

خون کا ایک چھوٹا سا تالاب ہے
اس میں چپ چاپ اوندھا پڑا شہر ہے

کاش دے کر ذرا سا سہارا اسے
اب اٹھا لے کوئی

اس کی ایڑی کی ہڈی میں اٹکی ہوئی
گرم زہریلی گولی نکالے کوئی

شہر زندہ ہے اب تک
بچا لے کوئی