Dhund se lipTa rasta

mere andar
mere aage pichhe bhi main hun

zamanon ke sayon ki wusat sameTe
mera daera apne imkan ki had pe nauha-kunan hai

jahan dhund ke sath bahti hui maut
ab ek jangal banae khaDi hai

meri aankh mein munjamid KHauf tahlil hone ko tayyar hai
ye wo lamha hai

jis ki gawahi ki namkini mera halal badan hai
magar kya ye mere liye hai?

kisi aur ki aankh mein KHauf tahlil hone ko tayyar bhi hai?
mere andar

mere aage pichhe koi aur bhi hai?
jahan main khaDa hun

wahan maut ki ungliyan jangali KHauf bunne mein masruf hain
yahan se bahut dur

ek nil-gun jhil mein tairti machhliyan
apni aankhon ki hairaniyan

saf shaffaf, pani mein yun gholti hain
mere honT jaise kisi jism ke aaine ke tahayyur ko toDen

wahan koi taza hawaon ke dariya mein
tairak hone ki KHwahish jagata hai

lekin jahan main khaDa hun
wahan zindagi DhunDne ki mashaqqat (mashiyat)

hamein zinda rahne pe majbur to kar rahi hai
magar aasmanon pe nazren jamae hue

hum ko patthar chabane ka aadi banae hue