Be-karan raat ke sannaTe mein

tere bistar pe meri jaan kabhi
be-karan raat ke sannaTe mein

jazba-e-shauq se ho jate hain aaza madhosh
aur lazzat ki giran-bari se

zehn ban jata hai daldal kisi virane ki
aur kahin is ke qarib

nind, aaghaz-e-zamistan ke parinde ki tarah
KHauf dil mein kisi mauhum shikari ka liye

apne par taulti hai, chiKHti hai
be-karan raat ke sannaTe mein!

tere bistar pe meri jaan kabhi
aarzuen tere sine ke kuhistanon mein

zulm sahte hue habshi ki tarah rengti hain!
ek lamhe ke liye dil mein KHayal aata hai

to meri jaan nahin
balki sahil ke kisi shahr ki doshiza hai

aur tere mulk ke dushman ka sipahi hun mein
ek muddat se jise aisi koi shab na mili

ki zara ruh ko apni wo subuk-bar kare!
be-panah aish ke haijaan ka arman le kar

apne daste se kai roz se mafrur hun main!
ye mere dil mein KHayal aata hai

tere bistar pe meri jaan kabhi
be-karan raat ke sannaTe mein!