zamana guzra hai lahron se jang karte hue
kabhi to par lagun Dubte ubharte hue
baDe hi shauq se ek aashiyan banaya tha
main kaise dekhun use TuTte bikharte hue
kabhi to zehn ke parde pe naqsh ubhrega
ye sochta hun tasawwur mein rang bharte hue
har ek maqam pe tufan ne daboch liya
jahan jahan bhi chhupa aandhiyon se Darte hue
wo bund bund qayamat wo nur nur badan
kisi ne dekha hi kab hai use sanwarte hue
wo meri zat se ab bad-guman nahin shayad
tabhi to dekh nahin sakta mujh ko marte hue
Ghazal
Zamana guzra hai lahron se jang karte hue
Rashid Anwar Rashid