زبان پہ نالہ و فریاد کے سوا کیا ہے

زبان پہ نالہ و فریاد کے سوا کیا ہے
ہمارے دل میں تری یاد کے سوا کیا ہے

ادھر تو رنگ ہے مستی ہے شادمانی ہے
ادھر بس اک دل ناشاد کے سوا کیا ہے

جو دیکھیے تو ادھر سو جہان ہیں آباد
ادھر اک عالم برباد کے سوا کیا ہے

خزاں کی فکر نہ اب انتظار فصل بہار
چمن میں شکوۂ صیاد کے سوا کیا ہے

ہے ایک ذات پہ ایمان اور یقیں مرکوز
سب اور کفر کے الحاد کے سوا کیا ہے

ہمارا نام و نسب پوچھنے سے کیا حاصل
مثال آبا و اجداد کے سوا کیا ہے

یہ آرزو ہے کہ تعمیر ہو مکاں رضوانؔ
ابھی زمین پہ بنیاد کے سوا کیا ہے