ye sochta hun charaghon ka ehtimam karun
hawa ko bhuk lagi hai kuchh intizam karun
har ek sans ragaD kha rahi hai sine mein
aur aap kahte hain aahon pe aur kaam karun
abhi to dil ki qayaadat mein panw nikle hain
talash-e-ishq ruke to kahin qayam karun
KHata-muaf magar itna be-adab bhi nahin
baghair dil ki ijazat tumhein salam karun
faqir-e-ishq hun kashkol-e-dil mein hasrat hai
gadagari ka mahasil bhi tere nam karun
mere junun ko sehra hi jhel sakta hai
kahin jo shahr mein niklun to qatl-e-am karun
Ghazal
Ye sochta hun charaghon ka ehtimam karun
Mehshar Afridi