یہ سرابوں کی شرارت بھی نہ ہو تو کیا ہو

یہ سرابوں کی شرارت بھی نہ ہو تو کیا ہو
آنکھ میں حیرت و وحشت بھی نہ ہو تو کیا ہو

ہم کہ اس ہجر کے صحرا میں پڑے ہیں کب سے
خیمۂ خواب رفاقت بھی نہ ہو تو کیا ہو

شکر کر حجرۂ تنہائی میں بیٹھے ہوئے شخص
خود سے ملنے کی یہ مہلت بھی نہ ہو تو کیا ہو

میں وہ محروم زمانہ کہ کبھی سوچتا ہوں
سانس لینے کی سہولت بھی نہ ہو تو کیا ہو

سوچتا ہوں میں سر دشت اڑاتا ہوا دھول
تیری یادوں کی عنایت بھی نہ ہو تو کیا ہو