ye jis ne jaan di hai nan dega
diya hai jis ne sar saman dega
mizha se us kaman-abru ki bachna
wo nawak hai kaleja chhan dega
mashaqqat se wo de ya be-mashaqqat
ba-har-surat ba-har-unwan dega
wo bosa de ke dil le kar ye bole
ewaz ehsan ka kya insan dega
milega qadr-dan-e-ishq hum ko
KHuda mashuq baiman dega
sunenge tab butan-e-hind apni
ijazat jab unhen shaitan dega
fasana kohkan ka sun ke bole
jo aashiq hoga wo hi jaan dega
na thi ummid tujh se qasim baKHt
dil-e-pur-dard o pur-arman dega
rah-e-ulfat ka hun kar-azmuda
kisi ko dil koi anjaan dega
chalega tir jab apni dua ka
kaleje dushmanon ke chhan dega
muqaddar se zyaada ek luqma
gada kya lega kya sultan dega
lipaT jaunga un se roz-e-waslat
agar mujh ko KHuda ausan dega
na phaila 'muntahi' dast-e-hawas ko
wagarna ye tujhe nuqsan dega
Ghazal
Ye jis ne jaan di hai nan dega
Mirza Maseeta Beg Muntahi