Wo rabte bhi anokhe jo duriyan barten

wo rabte bhi anokhe jo duriyan barten
wo qurbaten bhi nirali jo lams ko tarsen

sawal ban ke sulagte hain raat bhar tare
kahan hai nind hamari wo bas yahi puchhen

bulata rahta hai jangal hamein bahanon se
sunen jo us ki to shayad na phir kabhi lauTen

phisalti jati hai hathon se ret lamhon ki
kahan hai bas mein hamare ki hum use roken

haqiqaton ka badalna to KHwab hai 'fikri'
magar ye KHwab hai aisa ki sab jise dekhen