We suraten ilahi kis mulk bastiyan hain

we suraten ilahi kis mulk bastiyan hain
ab dekhne ko jin ke aankhen tarastiyan hain

aaya tha kyun adam mein kya kar chala jahan mein
ye marg-o-zist tujh bin aapas mein hanstiyan hain

kyunkar na ho mushabbak shisha sa dil hamara
us shoKH ki nigahen patthar mein dhanstiyan hain

barsat ka to mausam kab ka nikal gaya par
mizhgan ki ye ghaTaen ab tak barsatiyan hain

lete hain chhin kar dil aashiq ka pal mein dekho
KHuban ki aashiqon par kya pesh-dastiyan hain

is waste ki hain ye wahshi nikal na jawen
aankhon ko meri mizhgan Doron se kastiyan hain

qimat mein un ke go hum do jag ko de chuke ab
us yar ki nigahen tis par bhi sastiyan hain

un ne kaha ye mujh se ab chhoD duKHt-e-raz ko
piri mein ai diwane ye kaun mastiyan hain

jab main kaha ye us se 'sauda' se apne mil ke
is sal tu hai saqi aur mai-parastiyan hain