اس شوخ سے کیا کیجئے اظہار تمنا

اس شوخ سے کیا کیجئے اظہار تمنا
یہ لوگ کوئی سنتے ہیں گفتار تمنا

اک آرزو سب لے گئے ساتھ اپنے جہاں سے
انجام کسو سے نہ ہوا کار تمنا

یہ خوبیٔ قسمت کہ ملے باغ جہاں سے
سب کو گل امید و ہمیں خار تمنا

حسرت سے بھرا دل مرے پہلو میں نہیں ہے
پھرتا ہوں بغل میں لیے طومار تمنا

پہلو کو مرے باغ کیا عشق نے تیرے
زخموں سے مرا دل ہوا گل زار تمنا

مردوں سے حضورؔ ہو نہ سکے منت دونا
سر جائے پر ان سے نہ اٹھے بار تمنا