us ke junun ka KHwab hai kin tabiron mein
achchha wo lagta hai jakDa zanjiron mein
ab to mere lahu tak baat pahunchti hai
kaun sa rang bharun us ki taswiron mein
ban jate hain ek KHabar Dhah jaane ki
apna shumar bhi hai kachchi tamiron mein
us ka tarkash KHali hone wala hai
mere nam ka tir hai kitne tiron mein
mujh se sikho harf-o-nawa ki jadugari
DhunD rahe ho kya andhi tahriron mein
mere zer-e-qadam hai 'ramz' iqlim-e-suKHan
ek duniya ye bhi hai meri jagiron mein
Ghazal
Uske junun ka KHwab hai kin tabiron mein
Mohammad Ahmad Ramz