umr bhar kuchh KHwab dil par dastaken dete rahe
hum ki majbur-e-wafa the aahaTen sunte rahe
jab taKHayyul istiaron mein Dhala to shahr mein
der tak husn-e-bayan ke tazkire hote rahe
dip yaadon ke jale to ek bechaini rahi
itni bechaini ki shab bhar karwaTen lete rahe
ek uljhan raat din palti rahi dil mein ki hum
kis nagar ki KHak the kis dasht mein Thahre rahe
hum 'baqa' ek ret ki chadar ko oDhe der tak
dasht-e-mazi ke sunahre KHwab mein khoe rahe
Ghazal
Umr bhar kuchh KHwab dil par dastaken dete rahe
Baqa Baluch