ujDe dil-o-dimagh ko aabaad kar sakun
aisa to kuchh kiya nahin jo yaad kar sakun
aaKHir ko aadmi hun kabhi chahta hai dil
KHud ko tere KHayal se aazad kar sakun
khole zaban wo jo use jaanta na ho
mera to munh nahin hai ki fariyaad kar sakun
ek umr kaT gai magar ab tak hai justuju
din kaTne ka fan koi ijad kar sakun
apne hi gham ghalat hon suKHan se bahut hai ye
aisa hunar kahan ki ise shad kar sakun
barbaad ho ke lauTne wala hun main 'suhail'
aaya tha yun ki dahr ko aabaad kar sakun
Ghazal
UjDe dil-o-dimagh ko aabaad kar sakun
Suhail Ahmed Zaidi