Tum pasina mat kaho hai jaan-fishani ka libas

tum pasina mat kaho hai jaan-fishani ka libas
dhup mein chalte hue rakhte hain pani ka libas

parda-poshi kam se kam hoti hai har kirdar ki
pairahan lafzon ka banta hai kahani ka libas

phir ujale se safar hoga andhere ki taraf
jab utarenge badan se umr-e-fani ka libas

sath chalte hain chahakte bolte ilzam bhi
be-shikan hota nahin yaro jawani ka libas

inqilab-e-waqt ka ye bhi karishma dekhiye
hai numaish ke liye ab aan-jahani ka libas

muflisi ne kar diya hai us ki KHuddari ka KHun
wo pahanta hai kisi ki mehrbani ka libas

hukmaran to dafn hain tariKH ke auraq mein
dars-e-ibrat de raha hai hukmarani ka libas

jagmagata hai ghazal ke jism par har daur mein
maila hota hi nahin jadu-bayani ka libas

chand saat bhi KHushi ki apni qismat mein kahan
ras kab aaya hai mujh ko shadmani ka libas

'ramz' wo ahd-e-ghulami ho ki daur-e-hurriyat
ishtihaar-e-muflisi hindustani ka libas