tum ho ya chheDti hai yaad-e-sahar koi to hai
khaTkhaTata hai jo ye KHwab ka dar koi to hai
dil pe paDti hui duzdida-nazar koi to hai
jis taraf dekh raha hun main udhar koi to hai
aise nadan nahin raaton mein bhaTakne wale
jagti aankhon mein KHurshid-e-sahar koi to hai
KHud-baKHud hath gareban ki taraf uThte hain
sarsaraati si hawaon mein KHabar koi to hai
kis ka munh dekh rahi hai safar-amada hayat
su-e-maqtal hi sahi rahguzar koi to hai
tu mujhe dekh mere panw ke chhaalon pe na ja
zindagi tere liye KHak-basar koi to hai
din kaTa sara KHarabon mein bhaTakte 'aKHtar'
sham hoti hai chalo KHair se ghar koi to hai
Ghazal
Tum ho ya chheDti hai yaad-e-sahar koi to hai
Akhtar Saeed Khan