تم گلستاں سے گئے ہو تو گلستاں چپ ہے

تم گلستاں سے گئے ہو تو گلستاں چپ ہے
شاخ گل کھوئی ہوئی مرغ خوش الحاں چپ ہے

افق دل پہ دکھائی نہیں دیتی ہے دھنک
غمزدہ موسم گل ابر بہاراں چپ ہے

عالم تشنگیٔ بادہ گساراں مت پوچھ
مے کدہ دور ہے مینائے زر افشاں چپ ہے

اور آگے نہ بڑھا قصۂ دل قصۂ غم
دھڑکنیں چپ ہیں سرشک سر مژگاں چپ ہے

شہر میں ایک قیامت تھی قیامت نہ رہی
حشر خاموش ہوا فتنۂ دوراں چپ ہے

نہ کسی آہ کی آواز نہ زنجیر کا شور
آج کیا ہو گیا زنداں میں کہ زنداں چپ ہے