Tum apne shikwe ki baaten na khod khod ke puchho

tum apne shikwe ki baaten na khod khod ke puchho
hazar karo mere dil se ki is mein aag dabi hai

dila ye dard-o-alam bhi to mughtanim hai ki aaKHir
na girya-e-sahari hai na aah-e-nim-shabi hai

nazar ba-naqs-e-gadayan kamal-e-be-adabi hai
ki KHar-e-KHushk ko bhi dawa-e-chaman-nasabi hai

hua visal se shauq-e-dil-e-haris ziyaada
lab-e-qadah pe kaf-e-baada josh-e-tishna-labi hai

KHusha wo dil ki sarapa tilism-e-be-KHabari ho
junun o yas o alam rizq-e-muddaa-talabi hai

chaman mein kis ke ye barham hui hai bazm-e-tamasha
ki barg barg-e-saman shisha reza-e-halabi hai

imam-e-zahir-o-baatin amir-e-surat-o-mani
'ali' wali asadullah jaanashin-e-nabi hai