Tuk tu mahmil ka nishan de jald ai surat zara
kab talak bhaTke phiren ab hum se diwane KHarab
ye bhi kuchh andher hai ab zulf tere darmiyan
ghar base shane ka aur hon dil ke kashane KHarab
dil to KHun ho bah gaya aur hai jigar baqi so ab
us ki bhi haalat lagi hum ko nazar aane KHarab
ghar base to ghar mein kis ke ja basa hai bol uTh
masjiden viran hain tujh bin aur sanam-KHane KHarab
shama bhaDka shoala apna aag de fanus ko
kab talak phirte rahen gird us ke parwane KHarab
chup ho ab to ai 'raza' in KHakiyon par rahm kar
rone se tere hoe sab shahr-o-virane KHarab
Ghazal
Tuk tu mahmil ka nishan de jald ai surat zara
Raza Azimabadi