tujh ko sochon to tere jism ki KHushbu aae
meri ghazlon mein alamat ki tarah tu aae
main tujhe chheD ke KHamosh rahun sab bolen
baaton baaton mein koi aisa bhi pahlu aae
qarz hai mujh pe bahut raat ki tanhai ka
mere kamre mein koi chand na jugnu aae
lag ke soi hai koi raat mere sine se
subah ho jae ki jazbaat pe qabu aae
chahta hun ki meri pyas ka matam yun ho
phir na is dasht mein mujh sa koi aahu aae
us ka paikar kai qiston mein chhape nowel sa
kabhi chehra kabhi aankhen kabhi gesu aae
phir mujhe wazn kiya jae shahadat ke liye
phir adalat mein koi le ke taraazu aae
ab ke mausam mein ye diwar bhi gir jae 'shakil'
is tarah jism ki buniyaad mein aansu aae
Ghazal
Tujhko sochon to tere jism ki KHushbu aae
Shakeel Azmi