تری جدائی نے یہ کیا بنا دیا ہے مجھے

تری جدائی نے یہ کیا بنا دیا ہے مجھے
میں ایک جسم تھا سایہ بنا دیا ہے مجھے

سمندروں سے کوئی کم نہ تھی مری اوقات
بس ایک درد نے صحرا بنا دیا ہے مجھے

پرانے لوگ سمجھتے تھے کچھ نیا ہوں میں
نئے دنوں نے پرانا بنا دیا ہے مجھے

جو اس سے رشتہ تھا سب کو بتائے جاتا ہے
گئے دنوں کا حوالہ بنا دیا ہے مجھے

حسن جمیلؔ ان آنکھوں کی کیا کروں تعریف
خدا کو ماننے والا بنا دیا ہے مجھے