tha harf-e-shauq said hua kaun le gaya
main jis ko sun sakun wo sada kaun le gaya
ek main hi jama-posh tha uryaniyon ke bich
mujh se meri aba o qaba kaun le gaya
ehsas bikhra bikhra sa haara hua badan
chaDhti hararton ka nasha kaun le gaya
baaton ka husn hai na kahin shoKHi-e-bayan
shahr-e-nawa se harf o sada kaun le gaya
main kab se hun asir sarabon ke jal mein
nile samundaron pe ghaTa kaun le gaya
mai-KHana chhoD ghar ki fazaon mein aa gae
hum se mata-e-laghzish-e-pa kaun le gaya
main jab na tha to mujh pe bahut qahqahe lage
ahbab se sirisht-e-wafa kaun le gaya
Ghazal
Tha harf-e-shauq said hua kaun le gaya
Zubair Rizvi