تلخ گزرے کہ شادماں گزرے

تلخ گزرے کہ شادماں گزرے
زندگی ہو تو کیوں گراں گزرے

تھا جہاں مدتوں سے سناٹا
ہم وہاں سے بھی نغمہ خواں گزرے

مرحلے سخت تھے مگر ہم لوگ
صورت موجۂ رواں گزرے

میرے ہی دل کی دھڑکنیں ہوں گی
تم مرے پاس سے کہاں گزرے

کیوں نہ ڈھل جائے میرے نغموں میں
کیوں تیرا حسن رائیگاں گزرے

چند لمحے خیال و خواب سہی
چند لمحے انیس جاں گزرے

کتنے خاموش حادثے جاویدؔ
دل ہی دل میں نہاں نہاں گزرے