SimaT na pae ki har-su bikhar gae the hum

simaT na pae ki har-su bikhar gae the hum
hujum-e-yas mein kya soch kar gae the hum

hue the rakh to kuchh rasta hi aisa tha
dabi thi aag zamin mein jidhar gae the hum

ye kya ki phir se yahan hukmarani-e-shab hai
hisar-e-shab to abhi toD kar gae the hum

wo kya KHushi thi ki barbaad kar gai sab kuchh
wo kaisa gham tha ki jis se sanwar gae the hum

mili thin phir bhi wo diwaren ajnabi ban kar
agarche sham se pahle hi ghar gae the hum

ghire the maslahat-andesiyon mein puri tarah
jo dil ka sath na dete to mar gae the hum