sham-e-mazar thi na koi sogwar tha
tum jis pe ro rahe the ye kis ka mazar tha
taDpunga umr-bhar dil-e-marhum ke liye
kam-baKHt na-murad laDakpan ka yar tha
sauda-e-ishq aur hai wahshat kuchh aur shai
majnun ka koi dost fasana-nigar tha
jadu hai ya tilism tumhaari zaban mein
tum jhuT kah rahe the mujhe e'tibar tha
kya kya hamare sajde ki ruswaiyan huin
naqsh-e-qadam kisi ka sar-e-rahguzar tha
is waqt tak to waza mein aaya nahin hai farq
tera karam sharik jo parwardigar tha
Ghazal
Sham-e-mazar thi na koi sogwar tha
Bekhud Dehlvi