shak nahin hai hamein us but ke KHuda hone mein
chain hi chain hai raazi-ba-raza hone mein
kaun chhup chhup ke mohabbat nahin karta aaKHir
kya burai hai yahi khel khula hone mein
baat-be-baat unhen aadat hai KHafa hone ki
koi sani nahin rakhte wo KHafa hone mein
zinda rahne se baDa jurm bhala kya hoga
taham ek umr guzari hai saza hone mein
pahle duniya mein wafa koi sifat hoti thi
sharm aati hai ab arbab-e-wafa hone mein
masala ban gai chhoTi si burai ai 'shuur'
kya takalluf hai bhala aur bura hone mein
Ghazal
Shak nahin hai hamein us but ke KHuda hone mein
Anwar Shuoor