shahr ka shahr basa hai mujh mein
ek sahra bhi saja hai mujh mein
kai din se koi aawara KHayal
rasta bhul raha hai mujh mein
raat mahki to phir aankhen mal ke
koi sote se uTha hai mujh mein
dhup hai aur bahut hai lekin
chhanw is se bhi siwa hai mujh mein
kab se uljhe hain ye chehron ke hujum
kaun sa jal bichha hai mujh mein
koi aalam nahin banta mera
rang KHushbu se juda hai mujh mein
aisa lagta hai ki jaise koi
aaina TuT gaya hai mujh mein
aate jate rahe mausam kya kya
jo faza thi wo faza hai mujh mein
Ghazal
Shahr ka shahr basa hai mujh mein
Rais Farogh