shab-e-wasl bhi lab pe aae gae hain
ye nale bahut munh lagae gae hain
KHuda jaane hum kis ke pahlu mein honge
adam ko sab apne parae gae hain
wahi rah milti hai chal phir ke hum ko
jahan KHak mein dil milae gae hain
mere dil ki kyunkar na ho paemali
bahut is mein arman aae gae hain
gile shikwe jhuTe bhi the kis maze ke
hum ilzam danista khae gae hain
nigah ko jigar zulf ko dil diya hai
ye donon Thikane lagae gae hain
rahe chup na hum bhi dam-e-arz-e-matlab
wo ek ek ki sau sau sunae gae hain
farishte bhi dekhen to khul jaen aankhen
bashar ko wo jalwe dikhae gae hain
chalo hazrat-e-'dagh' ki sair dekhen
wahan aaj bhi wo bulae gae hain
Ghazal
Shab-e-wasl bhi lab pe aae gae hain
Dagh Dehlvi