sanam ke kuche mein chhup ke jaana agarche yun hai KHayal dil ka
pa wo to jate hi taD lega phir aana hoga muhaal dil ka
guhar ne ashkon ke yan nikal kar jhamak dikhai jo apni har dam
to hum ne jaana ki motiyon se bhara hai pahlu mein thaal dil ka
kabhi ishaarat kabhi lagawaT kabhi tabassum kabhi takallum
ye tarzen Thahrin to hum se phir ho bhala ji kyun-kar sambhaal dil ka
wo zulf pu-pech-o-KHam hai us ki phansa to niklega phir na hargiz
hamara kahna hai sach are-ji to kaam us se na Dal dil ka
main lahza lahza hun khinch lata wo phir usi ki taraf hai jata
karun 'nazir' us ki fikr main kya hai ab to mere ye haal dil ka
Ghazal
Sanam ke kuche mein chhup ke jaana agarche yun hai KHayal dil ka
Nazeer Akbarabadi