سارے نقوش جس پہ ترے آشیاں کے ہیں

سارے نقوش جس پہ ترے آشیاں کے ہیں
دیر و حرم غبار اسی کارواں کے ہیں

وادی و کوہسار و بیاباں و گلستاں
اجزائے رنگ رنگ مری داستاں کے ہیں

ہر چند کوئے یار بہت فاصلے پہ ہے
بدلے ہوئے ابھی سے مزاج آسماں کے ہیں

ہمدم ہنسی اڑا نہ دل داغ داغ کی
تحفے دئیے ہوئے یہ کسی مہرباں کے ہیں

ہوں ذہن کے دریچے اگر وا تو دیکھ لے
پروردہ سب یقیں مرے حسن گماں کے ہیں

کیا دشمنوں کی کیجئے اے دلؔ شکایتیں
مارے ہوئے تو ہم کرم دوستاں کے ہیں