Saqi-gari ka farz ada kar diya gaya

saqi-gari ka farz ada kar diya gaya
pani ka ghunT zahr mila kar diya gaya

bas tajrabon ki nazr hue apne sare KHwab
kya hum ne karna chaha tha kya kar diya gaya

wabastagi kisi ki to is gham-kade se hai
warna yahan pe kaun jala kar diya gaya

ab qaid KHatm hone ki wo kya KHushi manae
par qainch kar ke jis ko riha kar diya gaya

KHu-e-sitam tumhein di hamein KHu-e-zabt-e-gham
sab ko ba-qadr-e-zarf ata kar diya gaya

ek zikr aisa chheDa kisi gham-gusar ne
bharne ko tha jo zaKHm hara kar diya gaya