Ruki ruki si shab-e-marg KHatm par aai

ruki ruki si shab-e-marg KHatm par aai
wo pau phaTi wo nai zindagi nazar aai

ye moD wo hai ki parchhaiyan bhi dengi na sath
musafiron se kaho us ki rahguzar aai

faza tabassum-e-subh-e-bahaar thi lekin
pahunch ke manzil-e-jaanan pe aankh bhar aai

kahin zaman-o-makan mein hai nam ko bhi sukun
magar ye baat mohabbat ki baat par aai

kisi ki bazm-e-tarab mein hayat baTti thi
umid-waron mein kal maut bhi nazar aai

kahan har ek se insaniyat ka bar uTha
ki ye bala bhi tere aashiqon ke sar aai

dilon mein aaj teri yaad muddaton ke baad
ba-chehra-e-mutabassim ba-chashm-e-tar aai

naya nahin hai mujhe marg-e-na-gahan ka payam
hazar rang se apni mujhe KHabar aai

faza ko jaise koi rag chirta jae
teri nigah dilon mein yunhi utar aai

zara visal ke baad aaina to dekh ai dost
tere jamal ki doshizgi nikhar aai

tera hi aks sarishk-e-gham-e-zamana mein tha
nigah mein teri taswir si utar aai

ajab nahin ki chaman-dar-chaman bane har phul
kali kali ki saba ja ke god bhar aai

shab-e-'firaq' uThe dil mein aur bhi kuchh dard
kahun ye kaise teri yaad raat-bhar aai