روشنی سی دل کے زخموں میں اتر آنے کو ہے

روشنی سی دل کے زخموں میں اتر آنے کو ہے
اے شب غم پھر ترا چہرا نظر آنے کو ہے

آسماں پر شام کا تارا نظر آنے کو ہے
خواہشوں کا چڑھتا سورج جب اتر آنے کو ہے

کیا مسافت ہے کہ صحرا ختم ہوتا ہی نہیں
تم تو کہتے تھے کہ اس رستے میں گھر آنے کو ہے

پھر ہمارے ذہن و دل پر بزدلی طاری ہوئی
دیکھ لینا پھر کوئی پتھر ادھر آنے کو ہے

جھڑکیاں بیٹے کی سن کر اشک ماں نے پی لیے
درد لیکن بوڑھے چہرے پر ابھر آنے کو ہے

لفظ کی تہذیب کا بھی پاس لازم ہے جناب
گفتگو معیار سے نیچے اتر آنے کو ہے

کاٹ کر پیڑوں کو انساں جل رہا ہے دھوپ میں
اور یہ الزام بھی موسم کے سر آنے کو ہے

دیکھیے کیا ٹی وی چینل پڑھیے کیا اخبار میں
ان دنوں بھی کیا کوئی اچھی خبر آنے کو ہے