Raste ka intiKHab zaruri sa ho gaya

raste ka intiKHab zaruri sa ho gaya
ab iKHtitam-e-bab zaruri sa ho gaya

hum chup rahe to aur bhi ilzam aaega
ab kuchh na kuchh jawab zaruri sa ho gaya

hum Talte rahe ki ye naubat na aane pae
phir hijr ka azab zaruri sa ho gaya

har sham jald sone ki aadat hi paD gai
har raat ek KHwab zaruri sa ho gaya

aahon se TuTta nahin ye gumbad-e-siyah
ab sang-e-aftab zaruri sa ho gaya

dena hai imtihan tumhaare firaq ka
ab sabr ka nisab zaruri sa ho gaya