raqsan hai munDer par kabutar
diwar si gir rahi hai dil par
Tahni pe KHamosh ek parinda
mazi ke ulaT raha hai daftar
uDte hain hawa ki samt zarre
yaadon ke chale hain law-lashkar
peDon ke ghane muhib sae
ye kaun hai mujh pe hamla-awar
patton mein jhapak rahi hain aankhen
shaKHon mein chamak rahe hain KHanjar
ye kaun qarib aa raha hai
KHud mere hi naqsh-e-pa pe chal kar
ye kaun sama raha hai mujh mein
baiTha hua chup mere barabar
ye kis ka tanaffus-e-pur-asrar
ye kis ka tabassum-e-fusun-gar
ek karb sa ruh par hai tari
ek kaif sa chha raha hai dil par
Ghazal
Raqsan hai munDer par kabutar
Rais Amrohvi