rang us mahfil-e-tamkin mein jamaya na gaya
KHamushi se bhi mera haal sunaya na gaya
wahshat-e-dil ne hijabaat-e-jahan chaak kiye
ek parda ruKH-e-jaanan se uThaya na gaya
ishq ek dagh sahi daman-e-hasti pe magar
KHud mashiyyat se bhi ye dagh miTaya na gaya
kar diya daftar-e-hasti to pareshan dal ne
magar ek KHwab-e-pareshan ko bhulaya na gaya
wo andhera tha ki hangam-e-sahar bhi hum se
sham-e-andoh-e-judai ko bujhaya na gaya
sarhad-e-ishq se aage na baDhi wahshat-e-ishq
husn-e-hushyar ko diwana banaya na gaya
lakh unwan se bhulana unhen chaha tha 'rawish'
kisi unwan se magar un ko bhulaya na gaya
Ghazal
Rang us mahfil-e-tamkin mein jamaya na gaya
Ravish Siddiqi