raaz mein rakh teri ruswai ka qissa main hun
mujh ko pahchan tera dusra chehra main hun
dafan hain tere kai raaz mere sine mein
jo tere ghar se guzarta hai wo rasta main hun
muddaton baad bhi jari hai azabon ka safar
qatra qatra teri aankhon se Tapakta main hun
aa zara baiTh mere pas bhi kuchh pul ke liye
mere hamdam teri diwar ka saya main hun
ab bhi zinda hun teri ruh mein gham ki surat
kaun kahta hai ki TuTa hua rishta main hun
mujh ko pujegi tah-e-KHak jo duniya hai 'shakil'
kal jo TuTa tha falak se wo sitara main hun
Ghazal
Raaz mein rakh teri ruswai ka qissa main hun
Shakeel Azmi