qubul hai gham-e-duniya tere hawale se
ye bojh warna sambhalta nahin sambhaale se
suragh apna udhar hi kahin mile shayad
tane hue hain jidhar makDiyon ke jale se
main ek zarra-e-awara aur meri KHatir
samundaron si ye raaten ye din himale se
khuli to rakhta hun main ghar ki khiDkiyan lekin
wahi tamam nazare hain dekhe-bhaale se
kisi ki yaad bhi unwan-e-bewafai thi
paDe hain panw mein qabl-e-safar bhi chhaale se
sukun kitna hai ji ko ye soch kar ki hamein
haram se koi ilaqa na ab shiwale se
ye kam nahin ki main us ki dua mein shamil hun
kuchh aur chahiye kya dur jaane wale se
Ghazal
Qubul hai gham-e-duniya tere hawale se
Shaheen Gazipuri