qafas ko le ke uDna paD raha hai
ye sauda mujh ko mahnga paD raha hai
meri har ek masafat raegan thi
mujhe taslim karna paD raha hai
suna hai ek jadu hai mohabbat
ye jadu hai to ulTa paD raha hai
mohabbat hai hamein ek dusre se
ye aapas mein batana paD raha hai
jo rahna chahta hai la-talluq
talluq us se rakhna paD raha hai
samajhti thi bahut aasan jin ko
unhin kaamon mein raKHna paD raha hai
hui jati hai phir kyun dur manzil
mera panw to sidha paD raha hai
main kin logon se milna chahti thi
ye kin logon se milna paD raha hai
main ab tak mar nahin pai hun 'shabnam'
so ab tak mujh ko jina paD raha hai
Ghazal
Qafas ko le ke uDna paD raha hai
Shabnam Shakeel