qadmon se mere gard-e-safar kaun le gaya
manzil pe raste ki KHabar kaun le gaya
ru-e-ufuq se nur-e-sahar kaun le gaya
is auj tak kamand-e-nazar kaun le gaya
rakh di gai thi qadmon pe us ke utar kar
dastar jaanti hai ki sar kaun le gaya
is sath par kise tha meri zat ka shuur
itni tahon mein aa ke guhar kaun le gaya
sukhe daraKHt nezon ki surat gaDe hue
wo barg o gul wo shaKH o samar kaun le gaya
Ghazal
Qadmon se mere gard-e-safar kaun le gaya
Ghulam Murtaza Rahi