pech-dar-pech sawalat mein uljhe hue hain
hum ajab surat-e-haalat mein uljhe hue hain
KHatm hone ka nahin marka-e-ishq-o-hawas
masale sare mafadat mein uljhe hue hain
kis KHasare mein nazar hai ki simaT jati hai
kuchh abhi daera-e-zat mein uljhe hue hain
in mein to mujh se ziyaada hai pareshan-nazari
aaine shahr-e-kamalat mein uljhe hue hain
is pe dawa bhi ki ye kar-e-masihai hai
sare azhan KHurafat mein uljhe hue hain
kurra-e-KHak pe paDte hi nahin un ke qadam
dida-war sair-e-tilismat mein uljhe hue hain
nur-e-mutlaq ki hai tashbih na tamsil magar
hum ishaaraat o kinayat mein uljhe hue hain
Ghazal
Pech-dar-pech sawalat mein uljhe hue hain
Syed Amin Ashraf