پیہم اداسیوں سے بیاباں ہے زندگی

پیہم اداسیوں سے بیاباں ہے زندگی
دل میں بہار ہو تو گلستاں ہے زندگی

اے انتہائے کشمکش شیخ و برہمن
ہندو ہے زندگی نہ مسلماں ہے زندگی

بے‌ چینیوں میں غرق ہے سرمایۂ حیات
تعبیر ہائے خواب پریشاں ہے زندگی

ہے موت اختتام پریشانیوں کا نام
جب تک یہ زندگی ہے پریشاں ہے زندگی

غافل نہیں تو کیوں نہیں انجام پر نظر
ہر لحظہ ہر نفس جو گریزاں ہے زندگی

ہیں مختلف فسانۂ ہستی کی سرخیاں
پنہاں کہیں کہیں پہ نمایاں ہے زندگی

نظارۂ جمال سے غش ہوں میں اے سفیرؔ
بے ہوش مجھ کو دیکھ کے حیراں ہے زندگی